(1976) Otoñu

link

El cielu, con el orbayu,
yera una ñube de plomu
pintando de color gris
l'amanecer del Otoñu.

Facía musties les miraes
del candorosu palombu,
qu'embucháu nel palombar
trocara'l vuelu en reposu.

Ablayaba les tonaes,
faltes de bríu y arroxu,
qu'entonaben nes quintanes,
acohibíos, los mozos.

La vara la yerba seca,
afincada xunto al horru,
yera un montón de quexumbre,
esfumaos los sos contornos
ente los velos de ñiebla
que la cobrín con so embozu.

Les llágrimes que corrín
d'aquel cielu gris de plomu,
al cayer temblonamente,
como'l rodar d'un sollozu,
facín rosarios de cuentes,
en un rezar fervorosu.

¡Qué tristeza guarda en si
un amanecer d'Otoñu¡

Sin embargo, ye tristeza
que se desdobla nel gociu
del desfrutar de sentires
d'unos mundos misteriosos.

Ye como esi frutu verde
qu'al mordelu ye acidosu
pero que dexa un regustu
que pide golver por otru.

Quiciás porque la tristeza
siendo dolor, sobre tou,
seya dolor ñecesariu
pa non vivir d'enquivocos.
Que la verdá, de por sí,
tien más tristeces que gocios;
y engañase nun placer,
que suele durar mui poco
ye vivir ena mentira
de gocios más que dudosos.

Por ello l'Otoñu tien
en so existir quexumbroso
un acentu de verdá,
un sufrimientu añimosu,
que siendo padecimientu
lleva algo en sí de dichosu.

Non sé; non soi a explicame;
ye perdemás embrollosu
aclarar debíamente
los sentires del Otoñu.